23. Oktober 2013, von Edith

Sarganserländer Alpsegen

 

Ave Maria  Ave Maria  Ave Maria!

 

Bhüet s Gott und üser lieb Herr Jesus Chrischt,

Lyb, Ehr, Haab und Guet und alles, was hier umen ischt.

 

Bhüet s Gott und der lieb heilig Sant Jöüri,

der wohl hier uufwachi und höüri.

 

Bhüet s Gott und der lieb Sant Maarti,

der wohl hier uufwachi und waarti.

 

Bhüet s Gott und der lieb Sant Gall

mit sine Gottesheilige all.

 

 

Bhüet s Gott und der lieb heilig Sant Peiter.

Sant Peiter, nümm dy Schlüssel wohl in dyni rächti Hand

und bschlüss wohl uf dem Bären synen Gang,

 

dem Wolf der Zahn, dem Luchs der Chräuel,

dem Rappen der Schnabel, dem Wurm der Schweif,

dem Stei der Sprung.

 

Bhüet üs Gott vor solch böüser Stund.

 

Bhüet Gott alles hier in üserem Ring,

und die lieb Mueter Gottes mit ihrem Chind.

 

Bhüet Gott alles hier in üserem Taal,

allhier und überall.

 

Bhüet s Gott, und das walti Gott und das tüe der lieb Gott!

 

Ave Maria   Ave Maria    Ave Maria!

Kategorien: Blog Alp Schrina | Kommentare deaktiviert